.. كيفي كده
حلمي النونو نفسه يكبر....وحيكبر
Wednesday, November 01, 2006
ليه محدش بيكتب ....؟؟
فاضية بقي فبدعبس في عالم التدوين
علي الرغم اني اعرف التدوين من فترة كبييييييييرة وشفت وقريت مدونات قبل كده كتيييييييير الا اني اول مرة ادعبس في هذه
-العالم كل الدعبسة دي - ريلي ريلي دماغي ورمت
المهم اني لاحظت حاجة غريبة
نص خلق ربنا اللي عالنت عندهم مدونات .. حلو كلام جميل
تقريبا عديت علي كمية مدونات عليها القيمة
افهم بقي
ليه محدش بيكتب ... اغلب الناس فتحت المدونة لطعت موضوعين تلاتة وسكتت
يمكن
ان الفكرة استهوتهم زي حالاتي بس طلعوا مش ادها
ولا استخسار
ولا فاتحينها حلاوة روح اصلا تفرايح كده يعني
ولا انهم مش فاضيين زي حالاتي برضه
ولا لعبة جديدة جربوها واول ما زهقوا منها سابوها
ولا الموضوع جديد ولسه المدونة مفيهاش مواضيع
ولا طلع موضوع ملوش لازمة وتضييع وقت
ولا التدوين اصلا حاجة تدعوا للتوحد والبعد عن الناس
....
انه علي راي يوكا " سؤال يطرح نفسه " اجابته طبعا معروفه
الاجابة هي ... وانتي مالك اصلا دي حرية شخصية ده ايه الناس الرخمة دي
بس بجد استوقفني الموضوع ده وانا من عادتي مبحبش يبقي في كلام محشور في زوري حتي لو كان هايف.. اصلا ده السبب الرئيسي اللي من اجله عملت المدونة علشان ألك وارغي واتكلم براحتــــــــــــــــــــي ومفيش كلام يبقي واقف في زوري
بث خلاث سلامات نشوفكم بعدين